Frsm. meiri hl. fjh.- og viðskn. (Páll Pétursson):
    Herra forseti. Fjh.- og viðskn. hefur athugað þetta frv. og leggur meiri hl. til að það verði samþykkt með brtt. sem fluttar eru á sérstöku þskj.
    Meginbreytingin er sú að til viðbótar því ákvæði frv. að ekki skuli leggja sérstakan eignarskatt á eignir manna sem eru orðnir 67 ára eða eldri fyrir upphaf hlutaðeigandi gjaldárs, þá skuli heldur ekki leggja skattinn á þá menn sem nutu örorkulífeyris skv. II. og IV. kafla laga nr. 67/1971, um almannatryggingar, með síðari breytingum á því tekjuári sem næst er á undan álagningarári.
    Undir þetta rita nefndarmenn í fjh.- og viðskn., Páll Pétursson, Þórður Skúlason, Árni Gunnarsson, Kristín Halldórsdóttir, Matthías Bjarnason og Finnur Ingólfsson.
    Sú breyting sem hér er stærst, varðandi þá sem njóta örorkulífeyris, er tekin upp úr frv. sem hv. þm. Halldór Blöndal flutti í Ed. og er til meðferðar í nefndinni. Jafnframt leggjum við til að gerðar verði nokkrar breytingar frá frv. á stjórn sjóðsins, þ.e. að einn fulltrúi verði samkvæmt tilnefningu kirkjumálaráðuneytisins og formaður og varaformaður fjvn. og tveir fulltrúar skipaðir af menntmrn., þar af annar með sérþekkingu á sviði þjóðminjaverndar, og menntmrh. skipi formann nefndarinnar úr hópi stjórnarmanna.
    Við höfum einnig fjallað um ágætt frv. hv. 2. þm. Reykv. Birgis Ísl. Gunnarssonar og haft það undir við þessa afgreiðslu og til hliðsjónar.