Landbúnaðarráðherra (Halldór Blöndal) (andsvar) :
Herra forseti. Sú skoðun mín er alveg óbreytt frá því sem áður hefur verið að líta eigi á ferðamannaþjónustu sem gjaldeyrisskapandi atvinnugrein og hún eigi af þeim sökum að hafa sömu skattameðferð og útflutningsatvinnuvegir.
Í annan stað hef ég ekki verið með dylgjur í garð eins né neins. Ég hef aðeins skýrt frá því að eðlilegt sé að trúnaðarmenn ráðherra séu hans trúnaðarmenn.