Magnús Jónsson :
Virðulegi forseti. Eins og fram kemur í nál. styð ég frv. enda tel ég brýna nauðsyn til þess að það verði sem fyrst að lögum. Ég undirritaði hins vegar nál. með fyrirvara vegna þeirrar brtt. sem fyrir liggur og varðar viðbótargrein sem gert er ráð fyrir að komi á eftir 6. gr.
Eins og fram kom í máli formanns nefndarinnar, hv. 1. þm. Vestf., er þar lagt til að sjútvrh. sé heimilt með reglugerð að víkja frá ákvæðum frv. varðandi fullvinnslu um borð í bátum undir 20 lestum sem stunda línu- og handfæraveiðar. Ég neita því ekki að þrátt fyrir stuðning minn við frv. finnst mér þessi viðbót, sem lagt er til að komi við frv., koma næstum eins og skrattinn úr sauðarleggnum inn í texta frv. og anda þess. Svo augljóst er það öllum sem lesa frv. og greinargerðina að höfundar þess hafa áreiðanlega ekki eitt andartak látið sér í hug koma handfæra- eða önglaveiðibátar sem um aldir hafa flatt og saltað fisk um borð hér við land. Hvergi er minnst á færa- eða línubáta, hvorki undir eða yfir 20 tonnum, og í öllum greinum frv. er svo augljóslega verið að fjalla um stór vinnsluskip sem ég vil frekar kalla verksmiðjuskip. Í grg. með frv. verður þetta enn augljósara að aldrei hefur verið ætlunin að láta það ná til báta sem stunda línu- og handfæraveiðar. T.d. segir svo orðrétt í greinargerðinni, með leyfi forseta, og ég gríp bara niður í þetta á örfáum stöðum:
,,Núna eru 29 fiskiskip sem flaka og frysta botnfiskafurðir um borð auk þess sem hafin er vinnsla á saltfiski um borð í nokkrum fiskiskipum.``
Mér finnst þarna augljóslega ekki verið að fjalla um báta sem stunda línu- og handfæraveiðar. Og á öðrum stað segir svo, með leyfi forseta:
,,Með frumvarpinu er lagt til að eftirlit um borð í fullvinnsluskipum verði mjög aukið frá því sem verið hefur. Í fyrsta lagi er kveðið á um að eftirlitsmaður verði um borð fyrstu sex mánuðina eftir að fullvinnsluleyfi hefur verið veitt í fyrsta sinn.`` Er nokkuð í þessum texta sem gefur til kynna að þarna sé verið að fjalla um handfæra- eða línubáta sem salta fisk um borð?
Og í þriðja atriðinu: ,,Á undanförnum árum hefur verið unnið mikið starf við að auka nýtingu um borð í frystitogurum.`` Ekki er fjallað um þá þar. Og þó tekur nú kannski steininn úr í fjórða dæminu sem ég ætlaði að grípa ofan í: ,,Vinnsla á saltfiski um borð í veiðiskipum hófst fyrir fjórum árum síðan.`` Það var nú það. Þetta kemur mér mjög spánskt fyrir sjónir og finnst mér hér vera sögð nokkur tíðindi, einkum fyrir þá íslenska sjómenn sem hafa verið að veiða í salt á þessari öld og raunar miklu lengur. Og hvað haldið þið að íbúar franskra fiskibæja segðu þegar þeir læsu þennan texta, bæir sem hafa fengið mikið af og misst mikið á Íslandsmiðum, ekki fyrir fjórum árum eða svo heldur kannski fyrir einhverjum öldum síðan? Þannig raunar mætti lengi upp telja en ég ætla að láta hér staða numið. Vegna anda frv. kemur þessi grein um að heimilt sé að veita línu- og handfærabátum undir 20 brúttólestum einhverjar heimildir til frávika frá frv. nánast eins og skrattinn úr sauðarleggnum. Þess vegna hef ég lagt fram brtt. um að á eftir 6. gr. komi ný grein. Þar sný ég við efni þessarar tillögu sem kemur frá nefndinni og þá mundi nýja greinin hljóða eins og fram kemur á þskj. 767:
,,Ákvæði þessara laga eiga ekki við um flatningu og söltun um borð í smærri bátum er stunda línu- og handfæraveiðar. Sjútvrh. er þó heimilt að setja reglur um meðferð afskurðar og fiskúrgangs um borð í þessum bátum.``
Að öðru leyti styð ég frv. og tel það vera til mikilla bóta og raunar nauðsynlegt að það verði sem fyrst að lögum frá hinu háa Alþingi.