Páll Pétursson
:
Frú forseti. Ég er andvígur samningnum. Ég vil ekki veita flota Evrópubandalagsins heimildir til veiða á fullnýttum fiskstofnum í íslenskri fiskveiðilögsögu. Í samningnum er ekkert jafnvægi. Við látum verðmætan karfa en fáum í staðinn loðnu sem er sennilega einungis pappírsloðna. Ég tel mjög misráðið hjá ríkisstjórninni að hverfa frá þeirri grundvallarstefnu okkar Íslendinga að láta ekki aðgang að fiskimiðum okkar í skiptum fyrir tollfríðindi í Evrópubandalaginu. Ef menn vilja skilja á milli samningsins um Evrópskt efnahagssvæði og þessa fiskveiðisamnings þá ber okkur að neita Evrópubandalaginu um þessar fiskveiðiheimildir og fella samninginn. Ég segi nei.
