Ólafur Ragnar Grímsson (andsvar) :
Virðulegi forseti. Vandinn í þessu máli er sá að á árinu 1991 var sá sem að gerst átti að sjá með mismunandi skoðanir á málinu. Annars vegar sagði Ríkisendurskoðun í mars: Það er allt í fína lagi með þennan sjóð. Og hins vegar sagði hún í ágúst: Nei, það er ekki allt í fína lagi með þennan sjóð. Það hafði ekkert gerst í málefnum sjóðsins frá mars til ágústmánaðar til þess að réttlæta slíka breytingu. Það hafði ekkert nýtt komið til. Þess vegna segi ég við hæstv. fjmrh.: Það er ekki alveg augljóst að það hafi verið hægt að halda því fram að á árinu 1991 hafi mátt sjá þetta. Það er fyllilega mögulegt, eins og ég hef bent á, að ríkisstjórn hefði tekið áritun Ríkisendurskoðunar á ársreikninga Framkvæmdasjóðs góða og gilda og beðið svo þar til á árinu 1992 þegar kom að nýrri áritun, í mars t.d. 1992, með að taka málin til skoðunar af því að ekkert nýtt kom fram í málefnum sjóðsins. Þess vegna hef ég sagt í þessari deilu: Eitt er þó alveg víst í málinu, þ.e. hvenær Alþingi gerir sína samþykkt. Það er þó a.m.k. alveg ljóst. Allt hitt eru matsatriði og ég var að leiða rök að því með því að benda á þær staðreyndir að það geti verið nokkrum tilviljunum háð hvernig þau matsatriði eru. Ef t.d. fjmrh. hefði hampað áritun Ríkisendurskoðunar á ársreikningi 1990 þá hefði ekkert gerst.
Kjarni máls er að eitt er fast. Þegar forseti þingsins lýsir af forsetastól að frv. sé orðið að lögum og verði sent hæstv. ríkisstjórn til samþykktar þá er a.m.k. í öllum þessum umræðum um hina flóknu ríkisreikninga alveg ljóst hvenær það gerist.