Hæstv. forseti. Ég þakka þeim hv. þm. tveimur sem hafa talað fyrir undirtektir við þetta mál. Ég skil orð þeirra beggja svo að það sé fylgi þeirra við eflingu og aukið sjálfstæði Rannsóknastofnunar uppeldis- og menntamála og það er einn megintilgangurinn með flutningi þessa frv.
Það er vissulega rétt að rannsóknir og mat á skólastarfi hafa ekki verið í þeim farvegi sem æskilegt er og hafa kannski verið vanrækt eins og hv. þm. Valgerður Sverrisdóttir nefndi.
Ég læt að sjálfsögðu í ljós þá von að frv. fái afgreiðslu á þessu þingi. Mér er alveg ljóst að það er til nokkuð mikils mælst ef haldið verður við starfsáætlun þingsins og við ljúkum hér þegar ein vika er af maímánuði, en engu að síður mælist ég til þess að hv. menntmn. athugi þetta mál og hafi tíma til þess að fara rækilega ofan í það. Parkinson segir einhvers staðar á einum stað að málin leysist á þeim tíma sem sé til umráða og kannski getur það átt við í þessu tilviki.
Hv. þm. Kristín Ástgeirsdóttir lýsti efasemdum um tiltekin atriði í frv. og mér finnst alveg sjálfsagt að hv. menntmn. athugi þau atriði sérstaklega sem þingmaðurinn nefndi. Mér finnst það ekki ráða úrslitum um hvort þetta mál nær fram að ganga eða ekki, hvort ákvörðun hafi verið tekin um samræmd próf í framhaldsskólunum sem hefur verið rætt sem einn möguleika og nefnd um mótun menntastefnu hefur sett fram sem hugmynd. Ég ætla ekki að fara frekar út í það á þessu stigi hvort það sé skynsamleg leið eða ekki. Það tengist að sjálfsögðu umræðunni um aðgang að háskólastiginu hvort taka eigi upp samræmd próf í vissum kjarnagreinum í framhaldsskólakerfinu og það ætti þá að vega upp á móti hugmyndum sem hafa heyrst um inntökupróf í háskólana.
Hv. þm. spurði um hvernig framkvæmd 3. mgr. 3. gr. hefði verið þar sem þetta mun vera nokkuð óbreytt frá gildandi lögum, þ.e. að meðal verkefna rannsókna- og þróunardeildar væri að veita kennurum, kennaraefnum og háskólastúdentum í framhaldsnámi á sviði uppeldis- og menntamála þjálfun og ráðgjöf í fræðilegum vinnubrögðum eftir því sem aðstæður leyfa. Mér er því miður ekki kunnugt um hvernig það hefur verið framkvæmt til þessa, en það er sjálfsagt að afla þeirra upplýsinga og leggja þær upplýsingar fyrir hv. menntmn.
Varðandi ráðningartíma forstöðumannsins sem hér er lagt til að verði 5 ár, þá má það vel vera rétt sem hv. þm. Kristín Ástgeirsdóttir nefndi að þarna þyrfti kannski að gæta samræmis hjá hinu opinbera. Þetta
er komið í einstaka lagabálka að menn séu ráðnir til ákveðins tíma, en það mun vera eitthvað breytilegt. Ég ætla ekki að leggja mat á það hvort samræming sé þar nauðsynleg, en það má vel vera, en það er ekki endilega víst að það sé það eina rétta að ráða alla til 5 ára eða til fjögurra ára eða 8 ára eða hvað það er. Það er sjálfsagt að kanna það betur.
Varðandi spurninguna um 6. gr. hvernig háskólakennarar hefðu nýtt sér þá heimild sem er í gildandi lögum um að inna hluta af sinni vinnuskyldu með störfum innan stofnunarinnar. Ég hef heldur ekki upplýsingar um það en ítreka það sem ég sagði í minni framsögu að þarna er verið að breyta frá gildandi lögum að kennarar, ekki bara háskólakennarar, heldur kennarar og aðrir sérfræðingar í opinberri þjónustu fá þarna heimild til þess hjá rannsóknastofnuninni að inna hluta af sinni vinnuskyldu af hendi með störfum innan stofnunarinnar að fengnu samþykki forstöðumanns. Þessar upplýsingar ætti líka að vera hægt að leggja fyrir hv. menntmn.
Hv. þm. spurði um 7. gr. hvort það væri endilega rétt að rektorar skólanna þriggja, Háskóla Íslands, Kennaraháskólans og Háskólans á Akureyri, ættu að sitja í ráðgjafarnefndinni. Mér finnst sjálfsagt að nefndin athugi það. Þetta var tekið óbreytt upp úr gildandi lögum að því er varðaði rektora Kennaraháskólans og Háskóla Íslands og rektor Háskólans á Akureyri eðlilega bætt þarna inn í. Mér finnst sjálfsagt að nefndin íhugi þetta atriði hvort þarna eigi þá frekar að sitja fulltrúar þessara skóla. Mér finnst nokkuð til í því sem hv. þm. nefndi í þessu samhengi.
Um 8. gr. og hvernig starf stofnunarinnar skuli metið, ég tók orð þingmannsins þannig að hún væri samþykk þessu ákvæði að slíkt mat færi fram en efaðist kannski eitthvað um að sérfræðingar væru tiltækir. Ég held að svo hljóti nú að vera en ég sé ekkert að því í fljótu bragði að jafnvel yrði leitað samstarfs við erlenda háskóla til þess að framkvæma slíkt mat. Mér finnst það koma mjög vel til greina.
Ég ítreka þakkir mínar fyrir góðar undirtektir við þetta mál og vonast til að hv. menntmn. geti fundið sér tíma til þess að athuga málið eins rækilega og nefndinni þykir nauðsynlegt, en ég vona að að geti orðið þannig að málið hljóti afgreiðslu á þessu þingi.