Félagsmálaráðherra (Jóhanna Sigurðardóttir) (andsvar) :
Virðulegi forseti. Ég held að það sé ástæða til þess að velta þessu upp sem hv. þm. gerði varðandi 6. gr. frv. um gjaldtöku og hámark á gjaldtöku eins og hann nefndi. Ég vil þó vísa í 6. gr. og af hverju þessi ákvæði eru sett. Hér er fyrst og fremst verið að safna saman á einn stað þeim heimildum sem eru til töku gjalds vegna vanskilainnheimtu og fleiri þátta og það kemur fram í þessari grein að það sé ekki verið að auka við gjaldtökuheimild Húsnæðisstofnunar.
Það vantaði lagastoð varðandi þessa greiðslujöfnun sem hv. þm. nefndi en ég vil líka nefna það að í núverandi lögum er heimild til gjaldtöku, t.d. varðandi tæknideildina og þar er ekki sett neitt hámark þannig að við höfum þetta í löggjöf áður. Ég hugleiddi þetta vissulega þegar þetta var sett fram og ég tel að það ætti að nægja, það kemur fram í fjárlögum hverju sinni þær heimildir sem Húsnæðisstofnun hefur til afla sér sértekna þannig að á hverju ári kemur það fram á fjárlögum hvað er heimilt að afla til sértekna og þá ættu gjaldtökurnar að vera innan þess ramma.
Varðandi nýbyggingarnar þá eru þetta þær upplýsingar sem ég bestar hef og fram komu hjá mér í dag. Það eru að vísu kannski ekki sambærilegar tölur við það sem hv. þm. nefndi hér áðan vegna þess að ég hafði einungis undir höndum --- hafði ekki þær upplýsingar sem hv. þm. vitnaði til --- földa lána vegna nýbygginga en ekki fullgerðar íbúðir og þar koma þessar tölur fram. Þetta eru tölur sem ég hef besta vitneskju um og þar kemur fram að það 1.479 vegna nýbygginga 1984 og 1.404 árið 1985 og þær eru fæstar 1987 og 1988, þá fara þær í 700 og 800 og flestar 1.375. En ég skil nú ekki metinginn í þessu hjá hv. þm. vegna þess að við hljótum fyrst og fremst að byggja í samræmi við þörf hverju sinni og auðvitað á að byggja líka í samræmi við það hvernig markaðurinn er hverju sinni og það tel ég að hafi kannski ekki í öllum tilvikum verið varðandi verktakana. Þeir hafa byggt fleiri íbúðir en þeir hafa getað selt eða 400--500 íbúðir eru hér óseldar.