Virðulegur forseti. Hæstv. fjmrh. sagði að það væri óþarfi að skýra nánar sérstaklega ýmsar greinar þessa frv. Ég saknaði þess kannski ekki svo sérstaklega að hann færi ofan í einstakar greinar en ég saknaði þess sérstaklega að hann útskýrði fyrir okkur stefnu stjórnvalda í þessum málefnum. Það sem er raunverulega að gerast er það að verið er að setja upp tollmúra, það er verið að aðlaga sig ytri tollum Evrópubandalagsins með þessu frv. og ég tel að það sé óhjákvæmilegt að það verði útskýrt nákvæmlega fyrir okkur á hv. Alþingi, að það sé yfirveguð og tekin stefna af þeim stjórnvöldum sem nú ráða ferðinni í landinu. Ég reyndi að fá hæstv. utanrrh. til þess að segja álit á þessu fyrir nokkrum dögum. Út úr því fékk ég ekki neitt nema það að lokum að hann sagði að þetta frv. væri á ábyrgð utanrrn. og nú ber ég fram spurninguna aftur: Er það raunverulega ígrunduð og tekin stefna af þessari ríkisstjórn að aðlaga sig að ytri tollum Evrópubandalagsins með þessu frv. og í framtíðinni?
Það er verið að setja á 7,5% ytri tolla á þær vörur sem fjallað er um í þessu frv. og ég sé ekki
að annað sé hægt en fá skýr svör um það hvort það eigi að vera framtíðin að við múrum okkur af gagnvart öðrum ríkjum á þennan hátt. Auðvitað veit ég að að einhverju leyti er verið að reyna að fá til baka þær tekjur sem tapast við breytingarnar, þ.e. niðurfellingarnar á tollunum, en vitanlega var hægt að ná þeim til baka með hærri prósentum af vörugjöldunum og þurfti þess vegna ekki að gera mun á því hvaðan vörurnar kæmu. Það er ekki um neinn smámun að ræða. Annars vegar er verið að tala um að leggja gjöld á vörur frá löndum innan EES-svæðisins sem svarar 22,8% en á vörur frá löndum sem eru utan svæðisins 32,6%. Það er geysilega mikill samkeppnismunur á innflutning með þessum hætti. Það er kannski athyglisvert og ég ætla að rifja upp það sem stendur hér á bls. 6. í frv., með leyfi forseta:
,,Enn fremur er rétt að hafa í huga að meðal þeirra vöruflokka, sem frv. tekur til, eru vörur sem að stærstum hluta koma frá löndum utan EES svo sem bílavarahlutir. Ytri tollar mundu leiða til þess að verð á þessum vörum hækkar almennt þar sem tilfærsla viðskipta með þær milli svæða er aðeins möguleg að takmörkuðu leyti þegar um er að ræða sérhæfða vöru.``
Það sem verið er að segja er að vegna þess að menn hafi verið svo óheppnir að kaupa sér bifreiðar frá Japan eða öðrum löndum utan þessa svæðis þá geti þeir ekki annað en haldið áfram að kaupa varahluti í þá og þess vegna sé allt í lagi að hafa tollana hærri á þessum varahlutum.
Ég tel að stjórnvöld í þessu landi, sem hafa lýst því yfir --- ég tel að það hafi verið nokkuð skýrt í yfirlýsingu hæstv. forsrh. fyrir nokkrum dögum í þinginu --- að það væri ekki stefnt að inngöngu í EB, hefðu átt að sýna það í þeim frv., sem hér eru lögð fram, að ekki væri meiningin að ganga í EB. Ég tel að þarna sé raunverulega verið að sýna stefnuna svo að ekki verði um villst.
Ég get svo tekið undir það sem kom fram hjá hv. 1. þm. Austurl. að vitanlega vantar stefnumörkun gagnvart innlendri framleiðslu, innlendum framleiðsluiðnaði og innlendum þjónustuiðnaði. Það er auðvitað fyrirsjáanlegt að báðar greinarnar munu eiga í verulega aukinni samkeppni og ég tel reyndar að það sé nokkuð víst að þessi innlendi þjónustuiðnaður, sem hefur kannski verið stærsti hlutinn af iðnaði okkar, muni í framtíðinni þurfa að keppa mikið við útibú erlendra stórfyrirtækja. Verði allar þessar hugmyndir að veruleika, sem menn hafa í kringum þennan EES-samning, er náttúrlega fyrirsjáanlegt að þetta er leikvangur stórfyrirtækja. Það eru engin fyrirtæki til í þessu landi sem geta keppt við þessi stóru fyrirtæki. Það er ótrúlegt að það finnist framleiðsluvara á Íslandi sem ekki finnst einhvers staðar ódýrari á öllu EES-svæðinu og þar með er hún undir í þessari samkeppni. Og það er ótrúlegt að stórfyrirtæki í þjónustuiðnaði, sem á annað borð hafa einhverra hagsmuna að gæta hér á landi, muni ekki skoða það vandlega hvort þau eigi að koma upp þjónustu á sínum vegum. Þetta er það sem menn munu þurfa að keppa við í framtíðinni og ég tel að sé mjög ótrúlegt að sjá þegar ákvarðanir stjórnvalda, sem nú fara með völdin í þessu landi, birtast í svo mikilli alvöru, að ganga þessa götu til enda, að þau skuli ekki vera búin að undirbúa það meira sem koma skal heldur en orðið er.
Ég ætla ekki að fara að halda langa tölu um þetta mál. Fyrst og fremst átti ég erindi í ræðustól til þess að óska eftir því að fá að heyra hver sú stefnumörkun er sem er á bak við það að innleiða ytri tolla Evrópubandalagsins inn í íslenskt efnahagslíf.