[12:29]
Jóna Valgerður Kristjánsdóttir :
Virðulegi forseti. Ég vil þakka hv. flm. fyrir að endurflytja hér þessa tillögu. Hún er mjög þörf og ég verð að segja að mér finnst hún vera mjög vel unnin. Það er mjög vel gerð grein fyrir öllum þeim liðum sem hér eru taldir upp sem Alþingi þurfi að álykta og ríkisstjórnin að vinna að.
Ég vil sérstaklega nefna hér tvennt sem við lestur þessarar tillögu höfðaði til mín, þ.e. í 6. liðnum þar sem talað er um að það sé engin heildarstefnumótun til um íslenskt fiskeldi. Við kvennalistakonur höfum ítrekað gagnrýnt það úr þessum ræðustól hversu lítið er gert af því að setja sér heildarstefnumörkun í málum og ekki hvað síst svo stóru máli eins og hér er verið að ræða um. Það er mjög lítið gert af því að setja sér stefnumörkun og vinna síðan eftir þeirri stefnumótun. Það á ekki hvað síst við um fiskeldið því á árum áður var rokið af stað til að bæta úr atvinnuástandi í landbúnaðinum með því að koma sem víðast upp fiskeldi. Vel að merkja þá voru það að miklu leyti ekki ríkisrekin fyrirtæki heldur var þetta einstaklingsframtak sem farið var út í og vissulega mjög virðingarvert þar sem menn reyndu að koma þessu á fót. En ég held, eins og reyndar hefur oft verið rætt, að þar hafi oft verið farið af stað af meira kappi en forsjá og þess gjalda menn nú.
En það er einmitt vegna þess, eins og ég sagði í upphafi, að það vantar stefnumörkun í þessum
málum og ekki seinna vænna en sú stefnumörkun fari að koma fram. Það er nauðsynlegt að sú þekking sem hefur áunnist og reynsla glatist ekki heldur nýtist okkur í framtíðinni því ég er alveg sannfærð um að þó svo illa hafi tekist til sem við þekkjum á margan hátt þá er þetta atvinnugrein sem á framtíð fyrir sér. Þá er ég ekki bara að tala um laxeldi heldur fiskeldi almennt. Sú þróun sem er að verða í heiminum mun kalla á það að fiskeldi verði framtíðaratvinnugrein í stórum stíl.
Í öðru lagi vil ég nefna það sem talað er um í þriðja liðnum að það að lækka raforkukostnað fiskeldisstöðva hafi ekki komið til framkvæmda enn að neinu ráði. Raforkukostnaður í fiskeldisstöðvum og strandeldisstöðvum er mjög stór hluti af rekstrarkostnaðinum. Sú sem hér stendur hefur mjög gagnrýnt það hvernig staðið er að raforkusölu í landinu. Fiskeldisstöðvar geta ekki nýtt sér ótrygga orku þó þær hafi verið að leita eftir því og gæti það þó lækkað umtalsvert þeirra rekstrarkostnað sem er mikil þörf á að gera. Og það er alveg merkilegt til þess að vita í raun og veru að enn skuli sú staða vera uppi að við látum þetta rafmagn okkar, þessa vistvænu orku, renna ónýtta án þess að nýta hana til þess sem við gætum gert okkur til hagsbóta.
Þó ekki kæmust í framkvæmd nema þessi tvö atriði af þáltill. þá teldi ég það mjög til bóta. Bæði að sett væri einhver stefnumörkun um þessi mál og menn viðurkenndu að þetta er framtíðaratvinnugrein og einnig að þær stöðvar sem enn eru að vinna að þessum framkvæmdum geti lækkað sinn kostnað, m.a. með lækkun raforkuverðs.
Að öðru leyti þakka ég hv. flm., fyrir tillöguna. Hann hefur gert mjög vel grein fyrir þeim hugmyndum sem hann hefur um það hvernig hægt sé að efla fiskeldi. Ég vona svo sannarlega að tillaga hans fái góðan framgang í gegnum nefndir og í gegnum þingið.