[13:39]
Sigbjörn Gunnarsson :
Virðulegi forseti. Ég beini máli mínu til hæstv. fjmrh. Í 27. gr. laga um virðisaukaskatt frá 1988 eru ákvæði um viðurlög ef virðisaukaskattur er ekki greiddur á tilskildum tíma. Þau ákvæði voru sett með lögum nr. 119/1989. Í tilgreindu lagaákvæði er álag ákveðið 2% af vangreiddri upphæð fyrir hvern byrjaðan dag, þó ekki hærra en 20%.
Þegar þessi lagaákvæði voru sett geisaði hér mikil verðbólga og um mitt ár 1989 voru dráttarvextir hér á landi 45,6%. Eflaust eru slíkar álögur í fleiri lögum þó svo ég muni einungis eftir útsvarslögum í fljótu bragði.
Ég vil spyrja hæstv. fjmrh. hvort hann telji slíkt álag ekki gjörsamlega úr takt við tímann þar sem verðbólga og vextir hafa verið á hraðri niðurleið og verða vonandi enn.
Einnig vil ég spyrja ráðherra hvort hann telji að slíkar okurálögur skili þeim tilgangi sem til er ætlast.
