[14:10]
Steingrímur J. Sigfússon :
Hæstv. forseti. Ég kveð mér hér hljóðs til að leggja fyrir hæstv. utanrrh. spurningar varðandi viðskiptahindranir sem Frakkar hafa gripið til gegn innflutningi á fiski frá Íslandi og reyndar fleiri löndum. Ljóst er að algert ófremdarástand hefur skapast og með tæknilegum viðskiptahindrunum er nánast um praktískt viðskiptabann að ræða. Íslensku fisksölufyrirtækin í Frakklandi fá ekki hráefnið til vinnslu og menn eru að missa af viðskiptasamböndum af þessum sökum. Fiskur hleðst upp í nágrannalöndunum og hér heima og ekki er ólíklegt að á þessari stundu séu a.m.k. 1.000 tonn af fiskafurðum sem áttu að fara á Frakklandsmarkað til vinnslu eða sölu strand. Talsvert magn af fiski bíður ákvörðunar hér heima um það hvort það verði sent áleiðis til Frakklands með skipum á morgun eða ekki.
Óþarft er að minna á að fram undan er einn mikilvægasti tíminn í fisksölumálum á þessum markaði, þ.e. vikurnar fram að páskum. Frakkland er gífurlega mikilvægur markaður fyrir íslenskar sjávarvörur. Frakkland er fjórða mikilvægasta útflutningsland Íslands og það á einnig við um sjávarvörurnar sérstaklega. Ef skoðað er hvernig þessi útflutningur hefur þróast sl. ár, voru á árinu 1990 flutt út 48.500 tonn af sjávarvörum að verðmæti 6.800 millj. kr. Á árinu 1991 42.500 tonn að verðmæti 8,3 milljarðar, 8.300 millj., og á árinu 1992 48 þúsund tonn af vörum fyrir 7,7 milljarða. Áætlað er að á sl. ári hafi þessi tala verið á milli 8 og 9 milljarðar og hefði átt að stefna í svipað á nýbyrjuðu ári.
Það er því ljóst að hér er um gífurlega mikla hagsmuni að ræða fyrir íslenska útflytjendur. Samkvæmt fréttum hefur franska ríkisstjórnin lofað sjómönnum því að hindra innflutning á fiski með tæknilegum viðskiptahindrunum eða öðrum ráðum svo sem ýtrustu smásmugusemi í sambandi við sýnatökur, vottorð og annað því um líkt a.m.k. fram á mitt sumar og e.t.v. lengur. Því er haldið fram af fjölmiðlum að slíkt loforð hafi verið gefið. Þessi framkoma er satt best að segja ótrúleg í ljósi þess að þetta gerist á fyrstu vikum gildistíma samningsins um Evrópskt efnahagssvæði.
Hæstv. utanrrh. hefur talað meira um það en aðrir núlifandi menn að þessi samningur muni tryggja okkur hindrunarlausan og greiðan aðgang að öllum mörkuðum Evrópubandalagsins. Hæstv. ráðherra skuldar okkur því öðrum mönnum fremur skýringar á því sem þarna hefur gerst. Ég vil því leyfa mér að leggja eftirfarandi spurningar fyrir hæstv. utanrrh:
1. Hvað hefur utanrrn. eða ríkisstjórnin aðhafst til að hnekkja þessari einhliða aðgerð Frakka?
2. Stenst þessi aðgerð Frakka viðskiptareglur alþjóðatollabandalagsins GATT eða ákvæði samningsins um Evrópskt efnahagssvæði að mati utanrrh.?
3. Ef svarið er já, ef Frakkar geta gert nánast það sem þeir sýnist þrátt fyrir samninginn um EES, hvers konar samningagerð var þá þar á ferðinni?
4. Hefur ríkisstjórnin hugleitt gagnaðgerðir gegn Frökkum svo sem þær að stöðva innflutning á frönskum vínum, frönskum bílum eða öðrum slíkum vörum?
5. Hvaða áhrif hefur það að mati utanrrh. á samstarfið innan samningsins um Evrópskt efnahagssvæði ef ein samningsþjóðin kemst upp með framkomu af þessu tagi?