[16:46]
Steingrímur J. Sigfússon (andsvar) :
Hæstv. forseti. Ég þurfti ekki í sjálfu sér ferð til Austfjarða t.d. til þess að kunna og vita hvað fyrirtækin á norðausturhorni landsins hafa orðið að gera á sl. ári til að reyna að sækja út gegn þeim erfiðleikum sem minnkandi hráefnisframboð á Íslandsmiðum hefur skapað þeim. Hvað voru þau að gera? Þau voru að koma sér í viðskipti og fá hráefni til vinnslu af erlendum skipum og þau sendu sín skip á fjarlæg mið til veiða til að skapa þeim verkefni í stað þeirra sem ekki lágu þá lengur fyrir á Íslandsmiðum, m.a. úr minni heimabyggð. Ætli þau hafi haft nokkur áhrif á þá þróun sem þar var. Ég held að hæstv. sjútvrh. Þorsteinn Pálsson ætti ekki að fara út í það að gera mér upp skoðanir í sambandi við þau mál. Það fer óvenjuilla á því, a.m.k. í því tilviki.
Í öðru lagi í sambandi við efnahagsreikning sjóðsins, þá kem ég því ekki heim og saman að hann verði ekki nema 7--8 milljarðar. Ég veit ekki betur en atvinnutryggingardeildin sé með útistandandi skuldir upp á um 8,5 milljarða og síðan séu 500 millj. úr Hagræðingarsjóði og aðrar 500 úr Hlutafjársjóði og síðan spyr ég hæstv. sjútvrh.: Ef teknar verða svo að láni 400 millj. til viðbótar eiga þær ekki einhvers staðar að koma inn í efnahagsreikning sjóðsins? Ég er að spyrja um hvernig þetta fyrirbæri lítur út þegar það verður komið í gang og farið að starfa. Ég gaf mér að það hlyti að þýða að þarna væri á ferðinni sjóður upp á talsvert á annan tug milljarða króna þegar hann verður kominn í ,,fullsving``, eins og menn mundu segja, eftir lántökurnar o.s.frv.
Svo hefði ég gaman af því að leggja eina litla spurningu fyrir hæstv. sjútvrh. bara upp á grín, liggur mér við að segja. Telur hæstv. sjútvrh. Þorsteinn Pálsson að það sé ástæða til að borga mönnum úreldingarstyrki t.d. til þess að minnka loðnuskipaflotann? Metur hann stöðuna þannig að það sé þjóðhagslega hagkvæmt, það sé skynsamlegt rekstrarlega og það sé góð ráðstöfun á fjármunum að leggja peninga í það að minnka t.d. loðnuskipaflotann eða nótaveiðiskipaflotann eins og þau mál hafa þróast undanfarin ár?