[14:10]
Svavar Gestsson :
Virðulegi forseti. Ég geri ráð fyrir því að þegar ríkisreikningurinn kemur til meðferðar þá fái þetta sérstaka deilumál sem hér er rætt ítarlegri umræðu heldur en kostur er á í þetta skipti, m.a. með hliðsjón af því að hv. 2. þm. Norðurl. v., sem er einn af yfirskoðunarmönnum ríkisreiknings, er fjarverandi núna.
Ég vil hins vegar segja að mér finnst sérkennilega á þessu máli haldið. Ég verð að vísu að játa að áður en ég fór að vinna í þessum ríkisreikningsmálum þá hafði ég ekki áttað mig á þessum málum í einstökum atriðum. En það sem ég á erfiðast með að skilja í málinu er það að fjmrn. skuli ekki beita sér fyrir og knýja fram samkomulag í þessu deilumáli. Hér er fyrst og fremst um að ræða fyrirkomulagsatriði varðandi uppsetningu og frágang á ríkisreikningi á fjárlögum. Um þetta eiga menn ekki að þurfa að vera að rífast árum saman og halda langa fundi um mál af þessu tagi, takandi deilumál af þessu tagi fyrir undir hverju þingmálinu á fætur öðru um ríkisreikning og fjáraukalög. Menn eiga sem sagt að reyna að leysa mál af þessum toga, fyrirkomulagsatriði og uppsetningaratriði. Sérstaklega finnst mér að það sé brýnt að menn átti sig á því að Ríkisendurskoðun, sem er nú aðalráðgjafi Alþingis á þessu sviði, segir hvorki meira né minna en það að færslan á Hafnabótasjóði til framkvæmda við Sandgerðishöfn samrýmist hvorki hafnalögum né heldur lögum um ríkisreikning. Það er nú nokkuð mikið sagt. Það þarf dálítið hrausta menn, karla og konur, hér í þessari stofnun til að láta sem ekkert sé þegar Ríkisendurskoðun lætur frá sér fara þá niðurstöðu að færslan á lántökum Hafnabótasjóðs til framkvæmda við Sandgerðishöfn upp á 275 millj. kr. sé lögbrot. Það er sagt að það sé lögbrot. Það er alveg eins skýrt og það getur verið.
Í tilefni af þessu hafði ég kannski gert ráð fyrir að hæstv. fjmrh. mundi greina okkur frá því hvernig hann hygðist vinna að sáttum í þessu máli. Ég hafði ekki hugsað mér að fara að ræða málið ítarlega hér við þessa umræðu, en ég vildi úr því að hann er hér viðstaddur spyrja hann að því hvernig hann hyggst vinna
að sáttum í þessu máli.
Því er einlægt borið við að þessi ríkisreikningsnefnd --- ég hefði nú gaman af því að fara að sjá hana --- sé alveg stöðugt að endalausum störfum, með gengdarlaus fundarhöld og mikla pappírshauga. Það er nú meiri nefndin. Mér skilst að þessi nefnd hafi verið á fundum árum saman og aldrei tekið sér hlé frá störfum. En það kemur ekkert frá henni. ( Gripið fram í: Hún byrjaði 1990.) Búin að vera í fjögur ár. Þetta er sennilega einhver allra starfsamasta og erfiðasta nefnd sem um getur í nefndasögu Íslendinga og er það skrautleg flóra orðin eins og kunnugt er. En þessi ríkisreikningsnefnd sem átti að skila í hittiðfyrra og fyrra, fékk tvö termín á árinu 1993, ef ég man rétt, hún er víst ekki búin að skila enn þá. Það er alltaf beðið eftir þessum Godot, sem er þessi ríkisreikningsnefnd. Það væri kannski sniðugt ef hæstv. fjmrh. vildi t.d. útvega okkur mynd af henni einhvern tímann, þessari ríkisreikningsnefnd, til að vita hvernig þetta er. Helst kvikmynd til að það sæist hvernig þeir bera sig að við störfin í þessari ofboðslega merkilegu nefnd, þessari ríkisreikningsnefnd.
Ég vildi sem sagt inna hæstv. ráðherra eftir því hvað hann hyggst gera áður en hans tímabili lýkur, sem verður nú örugglega á einhverjum tíma. Kannski lifir hann ríkisreikningsnefndina, kannski að hún verði hjá næsta fjmrh. og þarnæsta líka, að menn séu æviráðnir í þá sjoppu. Það er nú einhver straumur frá ráðherranum að vísu yfir götuna sé ég núna, þarna í svarta húsið hinum megin, Seðlabankann, þeir vilja fara þangað bæði undir nafni og nafnleynd. Óska nafnleyndar. Það ku vera á leiðina þarna yfir götuna einhver maður frá hæstv. fjmrh. sem langar til að verða seðlabankastjóri líka. Þannig að það er brostinn flótti í liðið. En ég vona samt að þessi ríkisreikningsnefnd fái að halda sér, það sé ekki brostinn flótti í þá miklu verkmenn sem eru í ríksireikningsnefndinni, nema þeir séu að fara líka. Þá er nú skarð fyrir skildi og bregður sól sumri ef ríkisreikningsnefnd fer að leggjast af og menn geta hætt að bíða eftir henni.
En hvað hefur hæstv. ráðherra gert til að leysa úr þessum ágreiningi? Hann á auðvitað að gera það. Það er hans embættisskylda, sérstaklega þegar Ríkisendurskoðun kveður upp þann úrskurð að meðferð þeirra á færslum Hafnabótasjóðs sé lögbrot. Hvað hefur hann gert?