[21:24]
Sjávarútvegsráðherra (Þorsteinn Pálsson) (andsvar) :
Frú forseti. Það er mikill misskilningur sem kom fram í ræðu hv. 4. þm. Norðurl. v. að ekkert hafi verið hugað að rekstrargrundvelli sjávarútvegsins enda leiðrétti hann það síðar í ræðunni og minnti á þær tölulegu staðreyndir sem þar liggja fyrir. Með mjög umfangsmiklum ráðstöfunum eins og áður hefur komið fram í þessari umræðu, gengisbreytingum, afnámi skatta, skuldbreytingum og lækkun vaxta, hefur náðst sá árangur þrátt fyrir gífurlegt verðfall, 25% lægra afurðaverð en 1991 og þann mikla samdrátt sem hefur orðið í þorskveiðum, að koma málum þann veg fyrir að greinin skilaði á síðasta ári um 0,4% hagnaði og horfur eru á að sá hagnaður verði ekki minni á þessu ári. Þessar almennu ráðstafanir hafa þannig skilað sér með umtalsverðum hætti og gefið stjórnendum í atvinnugreininni tækifæri til að auka hagræðingu og gera meiri verðmæti úr því hráefni sem er til vinnslu. Ef við tökum sem dæmi um afkomu sjávarútvegsins til að mynda á Vestfjörðum af því hv. þm. vitnaði til þess að þar hefði skort almennan rekstrargrundvöll var hagnaður að meðaltali í rekstri sjávarútvegsfyrirtækja á Vestfjörðum 1992 um 1,5%, 0,2% tap á síðasta ári en fer upp í tæplega 2% ef fram heldur sem horfir á þessu ári.
En kjarni málsins er sá að með almennum ráðstöfunum hefur rekstrargrundvöllur sjávarútvegsins verið tryggður og hann býr nú við betri samkeppnisskilyrði en í áratugi. Hitt geri ég ráð fyrir að við getum orðið sammála um að kvótakerfið á mjög stóran þátt í því að stjórnendur atvinnufyrirtækjanna hafa náð að stórauka framleiðni í atvinnugreininni. Og það er eitt lykilatriði í því að við höfum ná þessum árangri.