[15:33]
Menntamálaráðherra (Ólafur G. Einarsson) :
Hæstv. forseti. Hv. þm. Svavari Gestssyni féllu ekki þau lokaorð mín að það kynni að ráðast af því hvort heilbrigðis- eða félagsmálayfirvöld tækju að sér að greiða þann kostnað sem af þessari sérstöku þjónustu leiðir. Sem fyrrv. menntmrh. þekkir hv. þm. Svavar Gestsson mætavel að það er ýmislegt lagt á Ríkisútvarpið sem er ákveðið af öðrum eins og t.d. niðurfelling afnotagjalda til fjölmargra aðila sem veldur tekjutapi hjá Ríkisútvarpinu upp á tugi milljóna króna. Það er einfaldlega þetta sem Ríkisútvarpið er að láta í ljós þegar það nefnir í sínum upplýsingum til mín að það kunni að ráðast af því hvort aðrir aðilar greiði að hluta til þessa þjónustu.
Ég vil svo aðeins í lokin taka undir með þeim sem leggja áherslu á sem besta þjónustu við heyrnarlausa og heyrnarskerta og ég trúi því að um það geti þingheimur allur sameinast.
