[13:23]
Vilhjálmur Egilsson :
Virðulegur forseti. Ég mæli hér fyrir brtt. frá efh.- og viðskn. Hún er við 3. gr. frv. og er þannig, með leyfi forseta:
,,6. gr. laganna orðast svo:
Lánastofnanir skulu undanþegnar stimpilgjaldi af fjárskuldbindingum sem þær kunna að taka á sig.``
Skýringin á þessari tillögu er sú að innlánsstofnanir, svo sem bankar, eru ekki stimpilgjaldsskyldar af verðbréfaútgáfu sem þær gefa út á innlendum markaði og það sama gildir um fjárfestingarlánasjóði.
Það sem hér er um að ræða er að eignarleigur sitji við sama borð og aðrir aðilar á fjármagnsmarkaði þannig að þegar eignarleigur gefa út skuldabréf á innlendum fjármagnsmarkaði þá falli ekki á það stimpilgjald frekar en aðrar fjármálastofnanir.
