[14:26]
Finnur Ingólfsson (andsvar) :
Virðulegi forseti. Ég vil byrja á að þakka hæstv. heilbr.- og trmrh. fyrir það að hann skuli hafa lýst því yfir að það standi ekki til að fækka bótaflokkum. Það er að vissu leyti nokkur áfangi. Hins vegar, og ég tek undir það með hv. 14. þm. Reykv., er mjög mikill munur á hvort það er skýlaus réttur eða heimild sem gefin er í lögunum til bóta. Og það er rétt hjá hæstv. heilbr.- og trmrh. að það hefur verið svo á undanförnum árum að menn hafa verið að stíga stærri og stærri skref í því að afla sér heimilda til að greiða út bætur. En hvaða bætur hafa það aðallega verið? Það hafa verið heimildir til uppbóta á þær bætur sem fyrir hafa verið, fyrst og fremst. Í nýjum bótaflokkum sem komið hafa inn hefur verið skýrt kveðið á, að ég hygg í flestum tilfellum, að rétturinn væri til staðar.
Mig langar að taka tvö dæmi af því sem hér er verið að breyta. Í 15. gr. almannatryggingalaganna, ég held að þetta sé enn þá svona, það sé 15. gr., vegna þess að það eru nokkrar breytingar sem hafa orðið á almannatryggingunum á undanförnum árum, en þar er sagt í núgildandi lögum: ,,Mæðralaun skulu greidd ekkjum``. Í 2. gr. þessa frv. segir: ,,Heimilt er að greiða mæðra- og feðralaun til einstæðra foreldra``. Þarna er grundvallarmunur á. Þetta eru ekki uppbætur á einhverjar bætur sem almannatryggingalögin gera ráð fyrir nú þegar. Þarna er um sérstaka bótaflokka að ræða sem Tryggingastofnun ríkisins er skylt að greiða út.
Annað dæmi: 14. gr. almannatryggingalaganna, ef lagagreinarnar eru enn réttar, ég tek það fram, er lagagreinin um barnalífeyri. Barnalífeyrir er greiddur með börnum yngri en 18 ára, hann er greiddur. Hins vegar segir í 3. gr. frv.: ,,Lífeyrisdeild Tryggingastofnunar ríkisins er heimilt að greiða barnalífeyri vegna skólanáms eða starfsþjálfunar``. Á þessu er grundvallarmunur. Auðvitað er það og ég trúi því að hæstv. heilbr.- og trmrh. núverandi muni ganga þarna varlega um. En það er ekki víst að allir alþýðuflokksráðherrarnir muni gera það.