[01:54]
Fjármálaráðherra (Friðrik Sophusson) (andsvar) :
Virðulegi forseti. Það er nú furðulegt að þurfa að standa hérna í kennslustund þegar þingmenn fara aftur og aftur með rangt mál. Jafnan sem gerð var í sumar á milli þessara þriggja aðila byggðist á því að tekjuskattur yrði færður niður um 1,5% og útsvarið hækkaði um 1,5%. Ef sveitarfélögin ætla öll að næla sér í 1,7% þá munu sveitarfélögin hvorki meira né minna en græða a.m.k. 320 millj. á meðan ríkið fer nokkurn veginn slétt út úr þessu.
Ég ætla að fara með þessar tölur: 1,5% lækkun tekjuskattshlutfalls einstaklinga, þ.e. 3,4 milljarðar kr., niðurfelling á skrifstofu- og verslunarhúsnæði 470 millj. kr., aukin hlutdeild sveitarfélaga í tekjuskatti felld niður, það eru tæpir 4 milljarðar kr., 500 millj. dragast frá vegna Jöfnunarsjóðs sveitarfélaga á móti afnámi landsútsvars, aukin skil ÁTVR í ríkissjóð eru 325 millj. kr. í plús og hækkun bensíngjalds 140 millj. í plús. Ríkið getur grætt í hæsta máta 55 millj. kr. samkvæmt þessu. Sveitarfélögin missa tæpa 4 milljarða, niðurfelling landsútsvars 120 millj. kr., hlutur Jöfnunarsjóðs mínus 500 millj., 1,5% í útsvari 3,4 milljarðar. Síðan er um að ræða hækkun á fasteignasköttum, sérstakt álag á verslunar- og skrifstofuhúsnæði og framlag ríkisins til Jöfnunarsjóðs. Þau tapa 80 millj. kr. þegar þau hækka um 1,5% en hver tíund úr prósenti er u.þ.b. 200 millj. kr.
Ég harma það að einstaka sveitarstjórnir og Alþýðusambandið hafa verið að rugla saman málum því það er eins og sagt er deginum ljósara að ríkið hefur í einu og öllu farið að því samkomulagi sem gert var í sumar. Menn verða að horfa til allt annarra hluta þegar rætt er um hækkun á tekjuskatti um 0,35% eins og ég hef sagt áður.