[13:45]
Jóhann Ársælsson :
Hæstv. forseti. Mig langar til að gera athugasemdir við þetta frv. og bera fram spurningar til hæstv. ráðherra. Það er sagt hér í 2. málslið 1. gr. frv., með leyfi forseta:
,,Rétt er að skrá skip hér á landi þegar íslenskir ríkisborgarar, sem eiga lögheimili hér á landi eða íslenskir lögaðilar, sem eiga heimili hér á landi, eiga það.``
Spurningin varðandi þetta efni er sú: Á að skilja þetta orðalag, þ.e. ,,Rétt er að skrá skip`` sem skýlausa fyrirskipun um það að íslenskir ríkisborgarar megi ekki eiga skip sem séu skráð undir öðru ríkisfangi? Ég tel það mjög mikilvægt að menn svari þessari spurningu skýrt og greinilega einfaldlega vegna þess að samkvæmt orðanna hljóðan þá ætti samkvæmt mínum málskilningi ekki að vera leyfilegt að íslenskir aðilar ættu skip undir erlendum fána.
Síðan langar mig til að spyrja um 2. gr. frv. þar sem segir: ,,Ef Þróunarsjóður hefur greitt styrk vegna úreldingar skipsins í samræmi við lög um Þróunarsjóð sjávarútvegsins, nr. 92/1994, með síðari breytingum.`` Þetta skil ég þannig að þarna eigi að binda í lög bann við því að skip megi vera á skipaskrá sem hafi verið greiddur úreldingarstyrkur út á. Ég tel að það sé óþarfi og ankannalegt að taka atriði eins og þau sem lúta að úreldingu skipa inn í skráningarlögin. Skráningarlögin eiga að mínu viti að fjalla fyrst og fremst um skráningu skipa en hvað svo sem menn taka sér fyrir hendur af einhverjum allt öðrum ástæðum en þeim sem lúta að öryggi og eignaskráningu skipa, á ekki að hafa áhrif á reglur um skráninguna. Ég tel þess vegna að þetta ákvæði sé fullkomlega óþarft þarna og að lög um Þróunarsjóð eigi þá að sjá fyrir því með hvaða hætti eigi að fyrirkoma þeim skipum sem Þróunarsjóður greiðir út peninga fyrir. Þessu tvennu vildi ég koma hér á framfæri en að öðru leyti ætla ég ekki að gera athugasemdir við þetta frv.