[11:14]
Egill Jónsson :
Virðulegi forseti. Hv. síðasti ræðumaður hafði mikið við það orð að athuga sem ég lét mér hér um munn fara, að það hefði ekki verið stórmannlegur gjörningur að leggja af þessa starfsemi á Vestfjörðum og Austfjörðum. Hann tók það að sjálfsögðu til sín. Hann er býsna viðkvæmur fyrir sínum embættisferli og það skil ég vel. En ég meinti þetta nú ekkert sérstaklega til hans, enda hefði ég þá nafngreint hann í þeim efnum.
Það eru hins vegar nokkur orð sem ég vildi láta falla hér út af ræðu hans. Það er þá í fyrsta lagi að fjárveitingar til rannsókna hafa frekar verið að aukast heldur en að minnka eða voru á þessum árum, en þeim hefur hins vegar verið beint í aðra farvegi. Í þessu sambandi er líka rétt að geta þess að það hefur farið æðigóður skerfur frá Framleiðnisjóði landbúnaðarins yfir í þessi verkefni, sem er reyndar meira en hæpinn gjörningur. Þannig að hér þarf ekki sérstaklega að vera að tala um það að þetta hafi leitt til sparnaðar. Málið er hins vegar það að það eru aðrar stofnanir sem fá þetta fjármagn og eins og menn vita gekk andvirðið af sölunni á Reykhólum til þess að byggja upp á Hesti. En Hestur hefur þar að auki fengið mikið fjármagn úr Framleiðnisjóði landbúnaðarins og tel ég þennan gjörning meira en vafasaman.
Þá hafði hv. ræðumaður orð á því að ég hefði verið að tala um þjónustu og talaði um leiðbeiningastarfsemi í þeim efnum. Það vill nú svo til að ég hef verið ráðunautur. Ég hef líka starfað að tilraunaverkefnum. Ég var að tala um dreifðar tilraunir og menn verða nú að skilja einfalda hluti eins og þá að tilraunir eru bundnar við þá staði sem þær eru gerðar á. Tilraun hér uppi á Keldnaholti eða á Sámsstöðum þarf ekki endilega að gilda annars staðar svo að ég nefni dæmi þar um. Og það er af þeirri ástæðu sem ég var sérstaklega að gagnrýna það að með því að láta þessar tilraunastöðvar falla niður hefur þessum rannsóknaverkum meðal bændanna sjálfra verið skotið fyrir horn. Og það er mikill misskilningur sem kom fram hér í ræðu hv. þm. að vegna þess að það hefði þrengt að í landbúnaðinum, þá væru minni ástæður til þess að stunda tilraunastarfsemi. Staðreyndin er sú að við erum í miklu meiri þörf fyrir slíka starfsemi núna en við vorum fyrir 10 árum síðan ( GÁ: Hver sagði þetta ...) einfaldlega vegna þess að áburðarþörfin og jarðvegurinn
breytist með tímanum og ég held að það sé afar þýðingarmikið t.d. að stórefla áburðartilraunir, sérstaklega t.d. með tilliti til notkunar á áburðarkalki, þannig að það er engin furða þó að við séum ekki sammála, ég og hv. 4. þm. Norðurl. e. um þessi efni. Það er því engin furða þó að við horfum með ólíkum hætti á þessa hluti. Það er í rauninni mjög eðlilegt.
Ég held að ég hafi þá farið yfir þetta sem var efnislega einhvers virði í ræðu hv. þm. En það er hins vegar kannski vert að ég geti þess svona í lokin sem hann talaði mikið um að ég hefði stutt ríkisstjórnir þessar eða hinar og enn þá kemur fram grundvallarmunur á skoðunum mínum og þessa hv. þm. að þó að mál gangi ekki fram með þeim hætti sem ég helst kysi þegar ég styð ríkisstjórn þá er það ekki þar með sagt að málið sé gott bara af því að ég styð ríkisstjórnina. Málið er hvorki betra né verra eftir því hvaða ríkisstjórn situr við völd. Og það er hárrétt sem þingmaðurinn sagði að það er búin að vera uppi sterk viðleitni frá því fyrir 1980 af fjárveitingavaldinu að leggja niður þessar tvær tilraunastöðvar og það tók sem sagt einn áratug. En það haggar því ekkert að bændur í þessum byggðarlögum hefðu verið betur settir ef þessari starfsemi hefði verið haldið við. Sú staðreynd er óhagganleg og það skiptir í þeim efnum ekki neinu máli hverjir það eru sem stjórna landinu. Sú niðurstaða liggur fyrir þrátt fyrir það.
Þá held ég að ég hafi nú farið yfir þetta sem efnislega kom fram í ræðu þingmannsins og læt því máli mínu lokið.