[16:17]
Páll Pétursson :
Frú forseti. Ég lít svo á að þetta frv. sé til bóta og mæli með því að það hljóti afgreiðslu hér á þingi. Það hefur verið mikið ólag á hrossaútflutningnum en hrossaræktin er helsti vaxtarbroddur íslensks landbúnaðar í dag og það eru býsna margir sem farnir eru að hafa atvinnu af hrossarækt og hestamennsku í einu eða öðru formi sem m.a. tengist útflutningi.
Bændur hafa hins vegar tiltölulega lítið upp skorið þó að þeir framleiði í flestum tilfellum hrossin. Vegna mikils framboðs á hrossum hafa milliliðir komist upp með það að kreista hrossin út úr bændum fyrir smánarverð, temja þau síðan eða meðhöndla eitthvað lítillega og selja þau síðan úr landi og hirða ágóðann að verulegu leyti.
Hæstv. ríkisstjórn þyrfti að reyna að koma hrossasölumálum í betra horf heldur en þau eru nú. Þá á ég einkum við það að reyna að fá niðurfellda þá háu tolla sem víða eru í útflutningslöndum en hrossaútflutningurinn verður að búa við verulegar tollaálögur. Hv. 4. þm. Norðurl. v., Elín Líndal, lagði fram fyrirspurn hér fyrir nokkrum dögum um afnám tolla á útflutningi reiðhrossa til landa á Evrópska efnahagssvæðinu og hæstv. utanrrh. hefur veitt svar við þessari fyrirspurn. Það liggur fyrir í þessu svari að utanrrn. ætlar ekkert að gera í málinu þar sem þeir halda eins og segir,með leyfi forseta: ,,Eitt þessara atriða er að gildandi viðskiptakjör á útflutningi reiðhrossa til Svíþjóðar verði yfirfærð á hið stækkaða svæði ESB og jafnframt að leitað verði eftir almennri lækkun útflutningsgjalda á reiðhrossum við útflutning til ESB-svæðisins.`` --- Þetta er forskrift sem sendimenn okkar fengu.
,,Þessu bréfi var komið á framfæri við fastanefnd Íslands í Brussel. Ljóst er þó að á brattann er að sækja að fá slíku erindi framgengt þar eð lægri tollar á reiðhestum í Svíþjóð byggjast ekki á neinum samningum milli Íslands og Svíþjóðar. Jafnframt gæti slík krafa kallað á gagnkröfu á sviði landbúnaðar.``
Svo mörg voru þau orð í svari hæstv. utanrrh. En mönnum til upprifjunar um þessa tolla er rétt að geta þess að t.d í Þýskalandi er á verðið og innflutningskostnaðinn lagður 25% innflutningstollur. Í Austurríki er 20% tollur reiknaður af kaupverði og flutningskostnaði. Í Sviss gilda þau lög að sé hestur hærri en 135 sm á stangarmáli þarf sérstakt leyfi til að flytja hann inn og aðeins eru gefin leyfi fyrir innflutningi á jafnmörgum hestum og fluttir hafa verið úr landi. Leyfin geta gengið kaupum og sölum og verð farið í allt að 150 þús. íslenskar krónur. Ef hestur er hins vegar lægri en 135 sm á stöng er greidd föst, lág upphæð vegna innflutnings.
Í Danmörk er 19% skattur á gelta hesta. Í Noregi er lagður á sláturskattur, 400 kr. Í Svíþjóð eru 8,10 sænskar kr. lagðar á hvert kg í sláturskatt og fyrir utan síðan virðisaukaskatt sem er að sjálfsögðu innanlandsmál á hverjum stað og í Stóra-Bretlandi eru afgreiðslugjöld og dýralækniskostnaður 50 pund. 18% tollur af geldingum reiknaður á kostnaðarverð hestsins en ekki í flutningnum. Ef um gelding er að ræða í Bretlandi er reiknað af kaupverði hans eftir að 18% tollurinn hefur verið lagður á.
Ég tel að það sé mjög brýnt verkefni og vil hvetja hæstv. landbrh. til þess að fylgja því eftir af fullri hörku að við fáum leiðréttingu mála okkar í þessu efni og eggja hann lögeggjan að vinna að málinu. Við erum að fara út í samninga við Evrópska efnahagssvæðið í framhaldi af breytingum sem verða á EFTA og þetta er eitt af þeim atriðum sem ekki má detta upp fyrir.