[12:29]
Finnur Ingólfsson :
Virðulegi forseti. Þrátt fyrir að hæstv. núv. félmrh. og fyrrv. félmrh., hv. þm. Jóhanna Sigurðardóttir, neiti að horfast í augu við þær staðreyndir sem blasa við mörgum heimila í landinu, þar sem þúsundir fjölskyldna eru að verða gjaldþrota, þá er það bara svo því miður að það blasir við neyðarástand á mörgum heimilum í landinu og það neyðarástand mun skapa margvísleg félagsleg vandamál. Það mun leggja auknar byrðar á félagsmálastofnanir, það mun auka örvæntingu einstaklinganna og það mun skapa sár í þjóðfélaginu sem seint munu gróa. Fyrir þessu ástandi eru tvær meginástæður:
Í fyrsta lagi eru það húsnæðismálin sem birtast í göllum húsbréfakerfisins, styttri lánstími, hærri vextir og aukin greiðslubyrði. Hæstv. fyrrv. félmrh., núv. þm. Jóhanna Sigurðardóttir, hækkaði vexti í félagslega íbúðarlánakerfinu um 140%. Og í almenna húsnæðislánakerfinu um tæp 70%. Að halda því svo fram að þetta hafi engin áhrif og það séu bara einhverjar nefndir sem hafi lagt hitt og þetta til, auðvitað verður hv. þm. að axla þá ábyrgð sem hann tók á sig í ráðherratíð sinni með því að hækka vextina um 140% og 70%. Ábyrgðin er fyrrv. félmrh. í þessum efnum. Og að halda því einnig fram að breytingin á fyrningunni úr 1% í 1,5% sé bara tilkomin út af einhverri nefnd, það var hæstv. þáv. fémrh. Jóhanna Sigurðardóttir sem ákvað að hækka fyrninguna og nú er það svo að fólk í félagslega íbúðarlánakerfinu er að borga í sex ár af lánum sínum en eignast ekki eina einustu krónu. ( JVK: Í 19 ár.) Reyndar í sex fyrstu árin eignast fólk ekki eina einustu krónu.
Í öðru lagi er það atvinnuleysið. Það eru stórhækkaðir skattar. Það eru auknar álögur í formi þjónustugjalda, lækkun barna- og vaxtabóta og vaxandi kjaraskerðing. Hvenær í tíð hæstv. félmrh. í ríkisstjórn Davíðs Oddssonar greiddi hv. núv. þm. Jóhanna Sigurðardóttir atkvæði gegn þessum aðgerðum? Aldrei. Hv. þm. greiddi atkvæðum með öllum þessum aðgerðum í tíð sinni sem félmrh. í ríkisstjórn Davíðs Oddssonar, öllum þessum aðgerðum: Lækkun vaxtabótanna, lækkun barnabótanna, hækkun skattanna. Hv. þm. ber ábyrgð á þessu. Þetta ástand og þeir erfiðleikar sem núna hafa skapast eru gróðrarstía fyrir fólk til að hugsa sig um hvort ekki sé rétt að skapa nýja stjórnmálaflokka, fá vantrú á þeim sem fyrir eru. En það er stórfurðulegt að fólki skuli detta það í hug að stofna stjórnmálaflokk í kringum stjórnmálamann sem ber ábyrgð á öllum þessum aðgerðum. Það er auðvitað stórfurðulegt.
Á flokksþingi framsóknarmanna var skuldastaða heimilanna eitt stærsta umfjöllunarefni þingsins. Það er tvennt sem við viljum leggja til í núverandi stöðu:
1. Þríhliða samning um lífskjarajöfnun.
2. Ráðgjafar- og endurreisnarstöð heimilanna.
Þríhliða samningur um lífskjarajöfnun felur það í sér að við þurfum að ganga strax til kjarasamninga ríkisvalds og aðila vinnumarkaðarins. Við framsóknarmenn eru tilbúnir til að beita okkur fyrir því að hægt sé að setja 3 þús. millj. kr. til að ná slíkum kjarasamningum. Við höfum líka verið með tillögur um það hvernig þessar 3 þús. millj. kr. skuli fjármagnaðar. Með því að skattleggja peningalegar eignir. Með hátekjuskattinum. Með því að taka upp samninga við aðila vinnumarkaðarins um nýtt skattkerfi sem lækkar jaðarskattana en eykur skattekjur ríkissjóðs og breytir skattbyrðinni. Með stórátaki í skattsvikamálum þar sem allur ágóði ríkisvaldsins af viðbótartekjunum inn í ríkissjóð mun fara til lífskjarajöfnunar og til þess að styrkja velferðarkerfið. Þessar 3 þús. millj. kr. viljum við nota til þess að hækka skattleysismörk, að gera persónuafslátt hjóna millifæranlegan að fullu, að hækka vaxtabætur og þær komi fyrr út í greiðslu og hækka barnabætur og leita leiða til þess að lækka vexti í bankakerfinu. Staðreyndin er sú að í bankakerfinu eru einstaklingar ekki að borga 5% raunvexti, 6%, allt upp í 10% raunvexti sem einstaklingarnir verða að greiða í bankakerfinu. Við viljum breyta Húsnæðisstofnun ríkisins í endurreisnar- og ráðgjafarmiðstöð heimilanna þar sem hlutverkið verði að vera með félagslega íbúðarlánakerfið og það að taka á þeim gríðarlegu skuldavandamálum sem blasa við heimilunum. Með samstilltu átaki aðila vinnumarkaðarins, lífeyrissjóðanna, bankakerfisins þar sem skuldirnar eru í samfélaginu og Húsnæðisstofnunar fari þessir einstaklingar í greiðsluaðlögun og hreint og beint í mörgum tilfellum í nauðasamninga þar sem komi til greina að vextir séu lækkaðir, hluti af skuld sé felldur niður, lánstími sé lengdur þannig að greiðslubyrðinni sé aflétt að stórum hluta af mörgum heimilunum.
En til þess að þetta sé hægt þarf að breyta Húnæðisstofnun ríkisins í þessa endurreisnar- og ráðgjafarmiðstöð. Það erum við framsóknarmenn tilbúnir að gera. 1983 var flotinn stopp. Þá komum við til valda í sjútvrn. og bárum ábyrgð á því að koma flotanum af stað. Nú eru heimilin strand og framsóknarmenn eru tilbúnir til þess að koma heimilunum aftur á flot. ( GÁS: Það gerðist meira 1983.) ( Gripið fram
í: Það var nú ekki seinna vænna.)