[prenta uppsett í dálka] 83. fundur
[15:41]
Dómsmálaráðherra (Þorsteinn Pálsson) (andsvar):
Herra forseti. Vinna að nýjum lögum um skipulag lögreglunnar er á lokastigi. Hins vegar hefur tekið aðeins lengri tíma að fullgera tillögur um það hvernig dreifa megi valdi og ábyrgð varðandi ákærur. Hugmyndin er sú að það verði gert í tengslum við skipulagsbreytingu á lögreglunni þannig að rannsóknir mála sem ætlað er að fari í stærri stíl en verið hefur út til lögreglustjóraembættanna sjálfra, fylgi innan ákveðinna marka ákæruvald. Reyndar hafa sýslumenn það í vissum tilvikum nú en ætlunin er að stíga stærri skref í þeim efnum. Embætti ríkislögreglustjóra, sem yrði væntanlega sett á stofn í tengslum við skipulagsbreytingar á lögreglunni, mundi væntanlega fjalla um rannsóknir og hugsanlega ákærur í hinum stærri efnahagsbrotum. Á þessu stigi get ég ekki farið lengra út í þá sálma en ég tel að skipulagsbreytingar af þessu tagi séu mjög brýnar og eigi að geta verið þáttur í að ná þeim markmiðum sem ég heyri að við erum sammála um að nauðsynlegt sé að vinna að.
