[prenta uppsett í dálka] 84. fundur
[15:01]
Flm. (Ásta R. Jóhannesdóttir) (andsvar):
Herra forseti. Andsvar gefur ekki langan tíma til að reifa málin enda var ég búin að flytja rök fyrir því að það er ærin ástæða fyrir að setja þessa vinnu í gang. Mér fannst gæta allmikils misskilnings á málinu hjá síðasta hv. ræðumanni. Það er eðli fjölmiðlastarfa að afla upplýsinga, afhjúpa spillingu og veita ríkisvaldinu aðhald. Skerðing á rétti fjölmiðlamanna til upplýsingaöflunar gerir þeim ókleift að sinna því hlutverki sínu. Þess vegna er þetta mikilvægt og sérstaklega í lýðræðisríkjum. Það sem hefur verið að gerast í öllum löndum í kringum okkur hefur verið í þá veru að tryggja rétt blaðamanna og fjölmiðlamanna til að halda trúnað við heimildarmenn sína. Ég get ekki farið nánar í þetta tímans vegna. En að sjálfsögðu mun nefndin sem sett verður á laggirnar til að fara í þá vinnu að tryggja þetta trúnaðarsamband í lögum, eins og ég vona að verði að veruleika, hafa umræðuna á Alþingi um þetta mál að leiðarljósi og til skoðunar, auk þeirra lagagreina sem snúa að fjölmiðlamönnum í þessu efni.
