[prenta uppsett í dálka] 89. fundur
[17:11]
Samgönguráðherra (Halldór Blöndal) (andsvar):
Herra forseti. Þegar forveri minn lét af embætti sem samgrh. 1991 var ekki einu sinni í þeirri langtímaáætlun sem þá lá fyrir gert ráð fyrir Öxarfjarðarheiði þannig að eitthvað hefur það markmið verið þokukennt og í miklum fjarska.
En það er rétt hjá hv. þm. að um það hefur verið ágreiningur milli mín og hans hvort rétt sé að fara yfir fjöllin milli Norður- og Austurlands eða hvort stefna ætti á það að leggja veg, með ströndinni var nú sagt á þeim tíma á þeim tíma, um Melrakkasléttu til Vopnafjarðar. Í samræmi við það var hafin uppbygging á Hellisheiði og gert ráð fyrir henni í þeirri vegáætlun sem samþykkt var af ríkisstjórn Steingríms Hermannssonar á sínum tíma. En á hinn bóginn var ekki gert ráð fyrir vegi yfir Fjöllin milli Norður- og Austurlands á þessari öld og um þetta varð ágreiningur okkar á milli.
