Guðmundur Árni Stefánsson:
Virðulegur forseti. Mér er alveg sama hvað formaður BSRB segir, eru orð fjmrh. Kannski segir þetta alla söguna. Ég kem hins vegar hér upp í framhaldi af orðum hæstv. félmrh. sem gat um það réttilega að það hafi verið í tíð minni sem félmrh. sem aðilar vinnumarkaðarins og ríkisvaldsins voru kallaðir að þessu borði til að fara yfir samskiptareglur á vinnumarkaði til að freista þess að bæta enn frekar samband þessara aðila og treysta þau bönd sem þar þurfa að vera á milli. Hins vegar var það aldrei ætlunin að keyra út einstakar tillögur úr þeirri nefnd einhliða með afli og offorsi eins og nú hefur verið gert. Því segi ég einfaldlega: Svona eiga samskiptareglur á vinnumarkaði ekki að vera. Með öðrum orðum: Niðurstaða þessa nefndarstarfs er gjörsamlega á haus við upphaflegt markmið þess.