Fyrirspyrjandi (Margrét Frímannsdóttir):
Virðulegi forseti. Ég þakka hæstv. fjmrh. svörin. Þau voru nokkurn veginn í þá veru sem ég átti von á og hefði þó viljað heyra það að í það minnsta um starfsemi víkingalottós ættu að gilda sömu reglur og er á hinum Norðurlöndunum en þar er það í flestum tilvikum ríkið sem fer með þennan rekstur.
Ég vil jafnframt beina þeirri spurningu til fjmrh. hvort farið er fram á skilagrein um rekstur happdrættis og nýtingu fjármuna, hvort eftirlit sé með því að fjármunir renni að öllu leyti til starfsemi sem er í samræmi við þau ákvæði sem eru í 4. gr. þeirra laga sem hann nefndi. Er krafist skilagreinar eða skattskýrslna til þess að hægt sé að fylgja eftir eftirliti á þessum rekstri, þar sem um verulega fjármuni er að ræða eins og ég nefndi áðan?