Samgönguráðherra (Halldór Blöndal) (andsvar):
Herra forseti. Hv. þm. er röskur maður og vill ákveðin svör. Í þessu frv. er ekki gert ráð fyrir því að leggja biðlaunaréttinn niður eins og gert hafði verið ráð fyrir í frv. þegar Síldarverksmiðjum ríkisins var breytt í hlutafélag heldur að biðlaunarétturinn haldist. Hér er enn fremur um almennar aðgerðir að ræða.
Ég álít að 8. gr. frv. standist eins og hún er hér lögð fyrir og hef á bak við mig lögfræðileg álit um þau efni. En eins og hv. þm. veit erum við ekki endanlegir dómarar í slíku máli ef stefnt yrði. Mitt mat er að þessi ákvæði standist og ég legg áherslu á að hér er ekki um það að ræða að leggja biðlaunaréttinn niður. Ég vil enn fremur vekja athygli á þeim mun sem er á þessu frv. og hinu. Hér er gert ráð fyrir því að Póstur og sími hf. verði áfram í eigu ríkisins, eitt hlutabréf verður gefið út og það er auðvitað mikil sérstaða í sambandi við það hlutabréf.