Árni M. Mathiesen (andsvar):
Herra forseti. Fyrr í umræðunum í dag kom fram að hv. 9. þm. Reykn., Guðmundur Árni Stefánsson, varaformaður Alþfl., er andvígur því að breyta Pósti og síma í hlutafélag. Ég gat ekki betur skilið á ræðu hv. 15. þm. Reykv., Össurar Skarphéðinssonar, en að hann væri meðmæltur því í grundvallaratriðum að breyta Pósti og síma í hlutafélag. Því hlýt ég að spyrja hv. 15. þm. Reykv.: Hvort er stefna Alþfl., sú sem hv. 9. þm. Reykn., varaformaður flokksins, boðaði hér í dag eða sú stefna sem hv. 15. þm. Reykv. boðaði í ræðu sinni hér á undan?