Ásta R. Jóhannesdóttir (andsvar):
Herra forseti. Vegna orða fyrri ræðumanns um að menn væru að velta fyrir sér staðsetningu flugvallarins held ég að það sé alveg ljóst hver vilji borgaryfirvalda er. Það kemur fram í Morgunblaðinu 3. mars, sl. sunnudag, í viðtali við borgarstjóra og ég vitna í þetta viðtal, með leyfi forseta. Í upphafi segir:
,,Ingibjörg Sólrún Gísladóttir borgarstjóri segir ljóst að innanlandsflug verði áfram á Reykjavíkurflugvelli.`` Og síðar í sömu grein: ,,Ég held að það sé alveg ljóst að innanlandsflug verður áfram á Reykjavíkurflugvelli. Spurningin er með hvaða hætti það á að vera.``
Ég get ekki séð annað en hér komi alveg skýr vilji borgarstjóra fram í þessu viðtali í Morgunblaðinu.
Aftur á móti eins og komið hefur fram í umræðunni þurfa menn að velta því fyrir sér með hvaða hætti og hvernig þurfi að standa að innanlandsfluginu. Vilji borgarstjóra er ljós og kemur vel fram í þessu viðtali í Morgunblaðinu sl. sunnudag.