Árni Johnsen (andsvar):
Virðulegi forseti. Það kemur ekkert á óvart þó hv. þm. eigi erfitt með að veita andsvar við svo almennum atriðum sem komu fram í minni ræðu. Það er erfitt að veita andsvar gegn þessum almennu leikreglum sem við búum við frá degi til dags. Það er fyrst og fremst höggvið að þeim með breytingum í þessum efnum. Breytingar eru alltaf af hinu góða, en það er ekki ástæða til að gera bara breytingar breytinganna vegna ef þær skila ekki árangri eða styrkja stöðu þjóðfélagsins í heild.
Það að ég hafi efast um fordæmingu á samkynhneigðum er ekki rétt að öðru leyti en því að ég spurði: Hafa þeir orðið fyrir einhverjum öðrum og meiri aðdróttunum en ýmsir aðrir á öðrum vettvangi sem ganga ekki hinn hvunndagslega veg?