Félagsmálaráðherra (Páll Pétursson) (andsvar):
Herra forseti. Ég notaði ekki orðið ,,nota`` eins og hv. þm. leiðrétti sig reyndar með. Ef ég man rétt talaði ég um að greiða fyrir kjarasamningum á næsta vetri og þar á ég í fyrsta lagi við viðræðuáætlunina sem ég held að sé mjög mikilvæg til að koma því svo fyrir að menn fari formlega að tala saman í tíma og leggi fram sínar kröfur áður en kjarasamningar eru lausir.
Í öðru lagi að gefa almennum félagsmönnum í verkalýðshreyfingunni, ekki bara þessum sem voru á pöllunum í dag heldur líka þeim sem að baki þeim standa, þessum 66 þúsundum eða þeim sem af þessum 66 þúsundum sem vilja blanda sér í málið, tækifæri til þess að hafa áhrif á meginákvarðanir og jafnframt almennum félagsmönnum í Vinnuveitendasambandinu til þess að hafa áhrif en láta ekki miðstýra sér úr Garðastrætinu.
Í þriðja lagi vil ég leggja auknar skyldur á sáttasemjara. Hann fær ekki auknar heimildir. Hann hefur þessar heimildir um sáttastörf í vinnudeilum sem eru í frv. en það er þrengt að honum með auknum skyldum áður en hann grípur til miðlunartillögu. Ég lít svo á að miðlunartillaga komi ekki til álita fyrr en algerlega er útséð um að samningar takist með öðrum hætti. En miðlunartillaga er þó langtum betri en lagasetning í kjaradeilum.