Ísólfur Gylfi Pálmason:
Herra forseti. Ég beini fyrirspurn minni til hæstv. menntmrh. Fyrirspurnin hljóðar svo: Hvernig er fyrir komið gjöfum sem gefnar voru hússtjórnarskólum í landinu? Eins og þingheimur veit hafa flestir hússtjórnarskólar landsins verið niður lagðir og hafa hætt starfsemi sinni. Ég hygg að aðeins einn slíkur skóli sé starfræktur, þ.e. Hússtjórnarskólinn á Hallormsstað.
Skólunum voru gefnar margs konar verðmætar gjafir, svo sem listmunir í formi hannyrða, málverka, höggmynda o.s.frv. Mikil verðmæti liggja í munum þessum, bæði peningalega og ekki síst tilfinningalega hjá því fólki sem starfaði í skólunum og eins nemendum sem þar stunduðu nám.