Menntamálaráðherra (Björn Bjarnason):
Herra forseti. Lög um Kvikmyndasjóð hafa verið til endurskoðunar og ætlunin var að flytja frv. um endurskoðun á kvikmyndalögunum nú á þessu þingi en frá því var horfið m.a. vegna þess að ríkisstjórnin tók þá ákvörðun við afgreiðslu fjárlaga að afnema þau viðmiðunarákvæði sem verið hafa í ýmsum lögum og snerta m.a. Kvikmyndasjóð. Og eins og hv. þm. er kunnugt, þá er málum nú þannig háttað að það er samkvæmt ákvörðun á fjárlögum ár hvert hvaða fjárhæðir renna í Kvikmyndasjóð.
Þrátt fyrir þetta tel ég rétt að halda áfram vinnu sem var hafin og er lokið að nokkru leyti um endurskoðun á kvikmyndalögunum. Hvort það leiðir til þess að stöðu Kvikmyndasjóðs verður breytt ætla ég ekki að fullyrða núna, en það er ákvörðunarmál Alþingis við afgreiðslu fjárlaga hve miklu fé er varið í sjóðinn. Eins og kunnugt er og þingmenn vita, þá eru þeir sem fá styrk úr sjóðnum ekki ánægðir með þær fjárhæðir sem þangað hefur verið veitt af Alþingi.
Önnur hlið er á þessu máli. Hún er sú hvort nokkru sinni er við því að búast að Kvikmyndasjóður sem starfar á núverandi forsendum, geti annað þeirri eftirspurn sem er eftir styrkjum úr sjóðnum og hvort það verði ekki að huga að styrkjum eða lánveitingum til kvikmyndagerðar á öðrum forsendum en mælt er fyrir um úr þessum sjóði, þar sem litið er á hann sem framlag til menningarmála. Hér er í raun og veru sprottin upp atvinnugrein kvikmyndagerðarmanna og þess er ekki að vænta að sjóður sem byggist á þeirri forsendu sem Kvikmyndasjóður gerir nú geti staðið undir þeim væntingum sem menn gera varðandi heila atvinnugrein. Þess vegna er það spurning sem ég hef varpað fram, m.a. á Iðnþingi, hvort það beri ekki að líta á þetta mál í öðru samhengi og líta til þeirrar staðreyndar að hér er kvikmyndaiðnaður orðinn atvinnugrein og fara þá svipaðar leiðir og aðrar þjóðir hafa gert varðandi stuðning við greinina.