Frsm. 2. minni hluta menntmn. (Lúðvík Bergvinsson) (andsvar):
Virðulegi forseti. Vissulega er það nýtt að verið er að lögfesta skólagjöld. Það er nýtt í málinu. Það að Alþfl. hafi á sínum tíma staðið að því að hækka hin svokölluðu skrásetningargjöld er vitaskuld sökum þess að hann taldi sig vera innan ramma laganna þegar þessi gjöld voru hækkuð. Síðan kemur einfaldlega á daginn að þær lagaheimildir sem þá voru til staðar dugðu ekki fyrir þeirri fjárhæð sem á var lögð. Umboðsmaður Alþingis rekur það mjög vel í sínu áliti og kemst að þeirri niðurstöðu að ákvörðun um þessa fjárhæð sé byggð á ólögmætum sjónarmiðum. Ef það á að breyta þessu frá því sem nú er þá á að koma með það undir réttum formerkjum, ekki undir einhverju dulnefni eða undir einhverju allt öðru nafni en þetta raunverulega er. Það kom fram hjá hv. 3. þm. Norðurl. e. að hún gerði sér fyllilega grein fyrir því að þær fjárhæðir sem koma til vegna skrásetningargjalda renna til almenns rekstrarkostnaðar. Hér er ekki verið að setja á skrásetningargjöld nema að hluta til. Skrásetningargjöld og þjónustugjöld eru fyrst og fremst hugsuð þannig að þau standi undir raunverulegum kostnaði sem hlýst af því að skrásetja menn til náms, það er ekkert annað, hvorki meira né minna. Umboðsmaður rökstyður það og gerir skilmerkilega grein fyrir því. Því eiga menn að koma með þetta inn á hið háa Alþingi undir réttu nafni og kalla þetta skólagjöld og gera þjóðinni grein fyrir því að hér er um kúvendingu að ræða í menntastefnu íslensku þjóðarinnar.