Hjálmar Jónsson (andsvar):
Herra forseti. Hv. þm. Hjörleifur Guttormsson talaði um varhugaverð ákvæði og hann talaði líka um það að frv. mundi rústa kenninafnasiðnum ef að lögum yrði. Ég er á annarri skoðun, andstæðri skoðun. Frv. mun verja kenninafnasiðinn.
Hv. þm. nefndi það einnig að ástæða væri til að gera skoðanakönnun um málið. Það hefur verið gerð skoðanakönnun. Gallup á Íslandi gerði seinni hluta árs 1994 skoðanakönnun. Þar var spurt: Til eru lög um mannanöfn á Íslandi. Finnst þér að það eigi að vera takmörkun á hvaða nöfn má gefa, eins og er í lögunum eða á þetta að vera alveg frjálst? Niðurstöðurnar eru þessar:
1. Meiri takmarkanir en nú eru vildu 1%.
2. Ánægðir með núgildandi lög voru 21%.
3. Aukið frjálsræði en þó einhverjar takmarkanir vildu 45%.
4. Algert frjálsræði vildu um 34%.
Herra forseti. Ég hygg að við förum nokkuð vel eftir vilja þjóðarinnar í þessum efnum.