[prenta uppsett í dálka] 137. fundur
Viðskiptaráðherra (Finnur Ingólfsson) (andsvar):
Herra forseti. Ég held að þetta heilræði fyrrv. hæstv. iðnrh. hafi í sjálfu sér verið ágætt og hv. þm. Hjörleifur Guttormsson ætti að vinna að einhverju leyti eftir því. En það að hugsa bara um náttúruauðlindir í jörðu út frá rennandi vatni og jarðgufu eða heitu vatni í jörðu, er að hugsa þröngt um hlutina. Það er akkúrat þannig sem stjórnarflokkarnir ætla ekki að taka á þessu máli vegna þess að mörg önnur jarðefni eru nýtanleg og eru oft á tíðum á einkalandi. Menn verða því, hv. þm. að horfa aðeins út fyrir túngarðinn hjá sér og líta á þessa hluti í dálítið öðru samhengi. Þessi jarðefni höfum við mörg til staðar í dag og erum að nýta. Ég tek sem dæmi vikurinn sem bæði er á landi í opinberri eigu og einnig í einkaeigu.
