[prenta uppsett í dálka] 137. fundur
Kristján Pálsson (andsvar):
Herra forseti. Hv. þm. Ásta Ragnheiður Jóhannesdóttir talar um þokukenndan skilning. Ég veit ekki hvers vegna hún hefur ekki getað skilið það að ég hef fyrst og fremst hag parsins í huga og er margbúinn að segja að ég telji að verði nafnleyndinni aflétt þá verður ekkert barn til í þessu tilfelli. Meðan svo er þá verðum við að lúta þeim reglum sem þarna eru.
Það er mjög skýr afstaða í frv. sem er verið að leggja fram af hálfu hv. allshn. Parinu er gefinn kostur á hvoru tveggja, annars vegar nafnleynd og hins vegar án nafnleyndar þannig að það er parið sem í öllum tilfellum tekur af skarið í því efni.
Ég ætla ekki að fara að rökræða hversu mikið þarf af sæði til þess að frjóvga eitt egg og hvernig getnaður hefur orðið til á undanförnum árþúsundum, það veit hv. þm. Ásta Ragnheiður Jóhannesdóttir jafn vel og ég. En ég ráðlegg henni einvörðungu að ræða um þetta við lækna á þessu sviði sem hafa upplýst hv. allshn. um þessi mál.
