Ragnar Arnalds:
Herra forseti. Fjármagnstekjur á að skattleggja eins og aðrar tekjur. Flatur 10% brúttóskattur ríkisstjórnarinnar án sérstaks persónuafsláttar refsar þeim sem litlar inneignir eiga en verðlaunar þá sem miklar innstæður hafa. Verst er þó að samkvæmt frv. lækkar skattur á arðgreiðslur úr rúmum 40% í 10%. Þetta ákvæði er höfðingleg gjöf til þeirra sem miklar eignir eiga í hlutabréfum og mun vinna upp fyrir þá og vel það, því sem þeir tapa á fjármagnstekjuskattinum. Ég segi já við því að þessu máli í heild verði vísað til ríkisstjórnarinnar og málið verði undirbúið fyrir næsta þing.