Össur Skarphéðinsson (andsvar):
Herra forseti. Áðan las ég upp úr ályktunum frá Þjóðvaka. Þá kallaði hv. þm. fram í að þetta hefði ekki verið samþykkt. Þessi ályktun sem ég las upp úr er í plaggi sem heitir Þjóðvaki, hreyfing fólksins, stefnuskrá, samþykkt á landsfundi 1995. Hv. þm. Svanfríður Jónasdóttir ætti því kannski að lesa örlítið betur þá stefnuskrá sem var samþykkt af hennar eigin flokki á hans eigin landsfundi. Og í blaði Þjóðvaka sem gefið var út skömmu fyrir kosningar, þ.e. mánudaginn 20. mars, segir t.d.:
,,Því hefur Þjóðvaki samþykkt að öllum smábátum og öðrum dagróðrarbátum sem veiða á aflamarki verði gefinn kostur á að velja krókaleyfi.``
Herra forseti. Þessi stefna Þjóðvaka er í stjarnfræðilegri firð frá málflutningi hv. þm. Svanfríðar Jónasdóttur. Þjóðvaki er hér í sínu eigin blaði að leggja til að öllum smábátum á aflamarki verði leyft að velja krókaleyfi. Ég held að það þurfi ekkert að sýna frekar fram á það, herra forseti, að hv. þm. Svanfríður Jónasdóttir er langt frá því sem hennar eigin hreyfing, hreyfing fólksins, lýsti yfir fyrir síðustu kosningar.