Svavar Gestsson:
Virðulegi forseti. Eins og kunnugt er þá hefur verið um það rætt að hugsanlega yrði störfum þessa þings frestað á þessum eða næsta sólarhring. Ég vil láta það koma fram í upphafi þessa fundar að svo óvenjulega vill til að ekkert samkomulag hefur náðst um það hvenær frestunin gæti orðið né heldur um það hvaða mál yrðu afgreidd áður en frestunin á sér stað. Þetta á m.a. við um það mál sem er nr. 10 á dagskránni og er náttúruvernd, stjfrv., 366. mál. Þessi mál og önnur eru í raun og veru í uppnámi enn þá. Þetta vil ég taka fram, hæstv. forseti, vegna þess að ég tel óhjákvæmilegt ef menn ætla að fresta þinginu í dag eða á þessum sólarhring að málin verði rædd miklu nánar en gert hefur verið.