Menntamálaráðherra (Björn Bjarnason):
Herra forseti. Ég vil þakka hv. þm. fyrir þau ummæli sem hér hafa komið fram í umræðunum. Þau hníga í sömu átt og svar það sem ég gaf að það sé eðlilegt að fornminjar séu geymdar og hafðar til sýnis á heimaslóðum, ef aðstæður leyfa, eða í sem nánustu tengslum við það umhverfi þar sem þær fundust. Í þeim anda vænti ég að þær reglur verði settar sem um var rætt í svari mínu, þannig að góð samstaða náist um það að hrinda málinu í framkvæmd með þeim hætti.