[14:10]
Pétur H. Blöndal (andsvar):
Herra forseti. Ég vil koma inn á þetta sem síðasti ræðumaður, hv. 14. þm. Reykv., Kristín Ástgeirsdóttir, gat um að það væri til mat á milli skóla. Það er mat nemendanna sem oft og tíðum byggir á mati foreldranna og reynslu þeirra fyrir 30 árum. Þetta er orðið dálítið gamalt mat. Það sem ég vil fá er mat á hverri stundu sem er opinberlega birt og er raunhæft, ekki bara einhverjar sögusagnir. Það er akkúrat galli við núverandi kerfi að þetta byggir allt á sögusögnum og jafnvel á reynslu foreldranna sem tóku stúdentspróf í viðkomandi skóla fyrir 30 árum.