[16:43]
Ágúst Einarsson (andsvar):
Herra forseti. Hæstv. fjmrh. hefur áhyggjur af þeirri stöðu sem nú er í verðlagsmálum. Ég deildi þessum áhyggjum með honum og hann talaði um leiðir til að bregðast við henni. Ég hef nefnt við hann tvær leiðir, raunverulega bestu leiðirnar í þessum málum ef hann hefur áhyggjur af þeim. Það er að taka á matarverðinu og það er hægt að gera með tilteknum hætti. Fjmrh. veit það ósköp vel. Það kostar hins vegar átök í hans eigin flokki að gera það, en þetta er skynsamleg leið í efnahagsmálum. Í öðru lagi ætti að endurmeta tekjubreytingafrv. sem hér liggur fyrir, en það er hluti af fjárlagafrv. sem tengist greiðslum úr almannatryggingakerfinu. Ef hann tæki á þessum tveimur þáttum, rétti hann fram sáttarhönd í erfiðri stöðu í þjóðfélaginu.