[18:08]
Ásta R. Jóhannesdóttir (andsvar):
Herra forseti. Ég geri mér það fyllilega ljóst að til eru karlar líka sem ekki eiga rétt á atvinnuleysisbótum. En þær konur sem eingöngu eru nú í húsmóðurhlutverkinu, margar hverjar orðnar fullorðnar og missa menn sína áður en þær verða 67 ára eiga ekki rétt á atvinnuleysisbótum. Það er algengara að konur hafi haft karla sem fyrirvinnur heldur en karlar eiginkonur sínar. Ég vil bara benda á að þetta er svona núna og það eru ekki háar upphæðir sem menn ætla að fara að spara þarna á lítilmagnanum. Ekkjulífeyrir er orðinn mjög tekjutengdur og nánast skertur út úr kerfinu.