[19:47]
Svavar Gestsson (andsvar):
Virðulegi forseti. Þetta er auðvitað hreinn útúrsnúningur. Ég er þeirrar skoðunar að það eigi að leggja fjármagnstekjuskatt á alla. Það á ekki að byrja á því að leggja fjármagnstekjuskatt á gamalt fólk og öryrkja og það á ekki að byrja á því að nota Tryggingastofnun ríkisins sem útibú frá skattstofunni. Það er það sem ég er að segja en hæstv. fjmrh. vill hvorki skilja það né hlusta á það. Er það kannski vegna þess að hann ætlar að nota þessa umræðu til að koma í veg fyrir það í fimmta sinn að fjármagnstekjuskattur verði lagður á yfir línuna? Ætlar hann að búa sér til úr þessu skálkaskjól fyrir íhaldið í landinu?