[16:54]
Ólafur Ragnar Grímsson:
Virðulegi forseti. Hér er til umræðu frv. til laga um breytingu á lögum um Þróunarsjóð sjávarútvegsins. Þróunarsjóður sjávarútvegsins var stofnaður á sínum tíma til þess að stuðla að alhliða þróun í sjávarútvegi þótt aðalhlutverk hans væri auðvitað að stuðla að endurskipulagningu flota og vinnslufyrirtækja. Það var hins vegar nokkuð rætt þegar lögin um sjóðinn voru afgreidd að mikilvægt væri að sjóðurinn gæti einnig staðið undir nafni hvað snertir aðra þætti í þróun sjávarútvegsins.
Nú hefur það verið að gerast eins og kunnugt er að ýmis sjávarútvegsfyrirtæki hafa verið að efna til samvinnu við fjölmarga aðila víða um heim á sviði sjávarútvegs og tvímælalaust hefur það orðið til að styrkja þessi fyrirtæki, bæði útgerðarfyrirtæki og sölusamtök. Hins vegar hefur það komið í ljós eftir því sem mér er tjáð að stjórn Þróunarsjóðsins telur sig ekki samkvæmt orðalagi í gildandi lögum hafa heimild til þess að liðsinna þessu nýja sóknarstafi í sjávarútvegi án þess að orðalagi í lögunum sé breytt.
Ég ræddi þessi mál lítillega hér utan þingsalar í vor þegar til meðferðar var minni háttar frv. um breytingar á Þróunarsjóðnum og í þeim viðræðum voru höfð góð orð um það að skoða þetta mál á haustþingi. Nú er flutt hér aftur frv. um Þróunarsjóðinn og þótt það snerti annan þátt en ég hef gert að umræðuefni þá tel ég það mjög mikilvægt að það sé rækilega skoðað í nefnd að gera jafnframt þá breytingu á lögunum að þau a.m.k. heimili stjórninni að taka til alvarlegrar skoðunar þátttöku íslenskra sjávarútvegsfyrirtækja í þróun sjávarútvegsins á þeim sviðum sem ég hef hér vikið að. Ég held að slík breyting eigi ekki að verða neitt deiluefni hér í þingsölum. Ég held að það sé víðtækur stuðningur, óháð flokksaðild, fyrir því að íslenskur sjávarútvegur hafi tækifæri til þess að nýta þá miklu þekkingu, þá miklu uppbyggingu sem þar hefur átt sér stað, bæði í sölufyrirtækjum og í útgerð, og einnig að íslenskur sjávarútvegur geti rutt markaðsaðgang fyrir margvísleg iðanaðarfyrirtæki sem framleiða vélar og tæki, net og annan búnað og getur þess vegna orðið mjög mikilvægur þáttur í að efla íslenskan iðnað.
Hér er ekki verið að tala um háar upphæðir. Það er einu sinni eðli þessara viðskipta að litlar upphæðir úr opinberum þróunarsjóðum geta mjög greitt fyrir því að íslensk fyrirtæki geti efnt til samvinnu við öfluga aðila víða um heim. Því miður er það þannig að það er engin slík starfsemi innan íslenska sjóðakerfisins en að mörgu leyti er eðlilegt að sjóði sem ber heitið Þróunarsjóður sjávarútvegsins og á sínum tíma þegar hann var settur upp átti m.a., þótt í litlu væri, að sinna þessu verkefni sé gert það kleift.
Ég vil þess vegna mælast til þess bæði við hæstv. ráðherra og eins við hv. sjútvn. að það verði skoðað um leið og þetta frv. er afgreitt að gera þá breytingu sem þarf að gera, sem mér skilst að sé ekki mikil, á lögunum um Þróunarsjóðinn svo hann hafi heimild til þess að koma til liðs við þess verkefni. Ég er alveg sannfærður um að slík breyting mun skila sér mjög rækilega, ekki aðeins til sjávarútvegsins heldur til íslensks atvinnulífs almennt. Satt að segja er það farið að standa ýmsum möguleikum fyrir þrifum að eiga ekki aðgang að slíku framlagi.
Ég ætla ekki nú við 1. umr. að ræða þetta nánar en fer vinsamlega fram á það við hv. nefnd og við hæstv. ráðherra að þessi þáttur sé rækilega skoðaður og er reiðubúinn að leggja þeim breytingum lið ef til kemur hér í þingsalnum.