Guðný Guðbjörnsdóttir (andsvar):
Virðulegi forseti. Ég vil þakka fyrir svör við einni af spurningum mínum, þ.e. að það sé enginn bótaréttur að hans mati. Ég vil bara benda á það að fyrr í dag komu ítarleg svör frá nokkrum lögfræðingum sem voru ekki sama sinnis. Ég sit í hv. allshn. og mun auðvitað sjá til þess að í gegnum þessi mál verði farið rækilega þar.
En ég ítreka aftur hinar spurningar mínar: Hvers vegna er ekki tekið á kvótabraskinu og hvers vegna, ef hæstv. sjútvrh. vill jafnræði á milli atvinnugreina, aðrar atvinnugreinar fá ekki frítt hráefni eins og sjávarútvegurinn fær?