Kristján Pálsson:
Herra forseti. Ég vil beina spurningum til hæstv. heilbr.- og trmrh. sem varða fatlaða og öryrkja, um bílastyrk sem hefur verið veittur til þess hóps á undanförnum árum. Það gerðist við fjárlagagerðina 1995 að styrkur til þessa hóps var lækkaður um 63 millj. eða 36%. Fjöldi styrkþega lækkaði úr 650 niður í 385. Ég velti því fyrir mér, herra forseti, og spyr hæstv. ráðherra: Hvað var gert við þennan niðurskurð? Var mismunurinn notaður til að bæta hag fatlaðra á öðrum sviðum eða fór þessi niðurskurður einfaldlega í almennan niðurskurð á fjárlögum?