Félagsmálaráðherra (Páll Pétursson) (andsvar):
Herra forseti. Frv. til laga um vinnumarkaðsaðgerðir var einróma niðurstaða af nefndarvinnu og þátt í henni tóku aðilar vinnumarkaðarins frá Vinnuveitendasambandi og Alþýðusambandi, frá BSRB og Vinnumálasambandi samvinnufélaganna svo og Sambandi ísl. sveitarfélaga. Það var fullt samkomulag í nefndinni um þetta mál og ég hreyfði ekki stafkrók áður en ég lagði það fram. Það er því ekki ástæða til að telja að þetta sé gert í blóra við verkalýðshreyfinguna.
Ég held að menn eigi að spara sér yfirlýsingar og meta þegar þessari kjarasamningalotu er lokið hvort sú lagabreyting sem gerð var í fyrravor hefur ekki verið til bóta.